Chief Minister chuan, Thenzawl Peace City hi Mizorama Plan City hmasa ber leh a awm chhun a ni dawn a. Khawpui changkang leh mawi tak, khualzinte tlawh nasat khua ni khawpa duan kan duh a ni, a ti a. Master plan-a an tihtel a tana a ngaihpawimawhte a hrilh a, tha tak leh chak taka thawk turin a hrilh a, a tul dan a zira State Project Monitoring Committee in an vil tur thu a hrilh bawk.

Thenzawl Peace City Master Plan siam hna thawh chungchang Pre Bid Queries rawn ngaihventu hi Company lian tak tak 18 an awm a. Tender tihchhuah a nih hnuah uluk takin a chhangtute hi endik an ni. Ram 100 aia tama hetiang lam lo thawk tawh, ram hrang hrang pangaa office nei, India ramah pawh office hmun 20 a nei mek, India hmun hrang hranga City Master Plan lo siam tawh thin, IPE Global hi thlan an ni ta a ni.

IPE Global hi Inremna hi ziahpui an ni tawh a, inremna ziah atanga hapta thum chhungin Mizoramah office an rawn hawng ang a. An hna an tan nghal dawn a ni.

IPE team hi an Senior Development Expert Anil Bansal leh a thawhpui expert dangte an lo kal a. Mizoram sorkar official pawimawh Pu Sudir Kumar, Principal Secretary, GAD leh Lalmalsawma Pachuau, Secretary, UD & PA te an tel bawk.